قام دكتور ياسر من نومه ليصلى الفجر فوجد نور حجرة ابنته مضاءًا...طرق الباب ووجدها فى حالة مزرية...تحت عينيها هالات سوداء وأمامها عدة فناجين قهوة فارغة وشعرها منكوش وتكاد تتساقط من التعب على الكتاب.
د. ياسر: مالك يا بنتى
يارا: عندى شيت لازم أسلمه الساعة 9 الصبح يا بابا ولسه فيه كتير
د. ياسر: يعنى فاضلك كام مسألة؟
يارا: لا أنا خلصته من الساعة 1 لكن بأراجع أحسن تتطلع حاجة غلط
د. ياسر: من الساعة 1 للساعة 5 بتراجعى؟ خلاص كفاية مراجعة وقومى صلى الفجر ونامى
يارا: أنا أصلا لم أصل العشاء يا بابا ..غرقت فى الشيت ومخدتش بالى
د. ياسر: باه ده كلام يا يارا! أحنا مش عارفين أنه لا بركة فى عمل يؤخر الصلاة
يارا: أعمل إيه يعنى يا بابا ما أنا نفسى أجيب تقدير كويس مرة واحدة فى حياتى
د. ياسر: مش فاهم! أنتى مش جايبة جيد جدًا السنة اللى فاتت
يارا: جيد جدًا إيه بس يا بابا؟ أنا عاوزة أطلع الأولى على الدفعة ...أنا حاسة أنى فاشلة فى الكلية دى وبأفكر أحول
د. ياسر: أحنا يا بنتى مش أتكلمنا فى الموضوع ده أكتر من مرة وقلت لك أن الجامعة غير المدرسة...فى المدرسة العدد كان محدود فسهل تتطلعى الأولى
فى الجامعة عدد الطلاب أكثر بكثير ..وأسئلة الامتحانات أعقد...أنا مجبتيش امتياز مش معنى كده انك فاشلة...معناه أن قدرات على قدر جيد جدًا
يارا: بس أنا مش مقتنعة أنا حاسة أنى لو ذاكرت كويس ممكن أجيب امتياز
د. ياسر: مش مختلفين! حاولى على قدر استطاعتك لكن أعطى لكل ذى حق حقه...مش تموتى نفسك
ثم اقترب منها وربت على كتفها: يا حبيبتى أنتى لازم تعرفى أنى هأفضل أحبك وفخور بيكى سواء جبتى امتياز أو مقبول
سواء طلعتى أستاذة فى الجامعة أو مهندسة عادية فى شركة
حبى لكى غير متوقف على تفوقك العلمى...المهم عندى أنك تكونى سعيدة
يلا عشان نصلى الفجر
بعد صلاة الفجر أخذ د. ياسر ينظر لصورة زوجته المتوفاة ويفكر
"الله سامحك يا سلوى...أنتى اللى عملتى فى البنت كده
كنتى دائمًا بتعاقبيها على أى غلط أو هفوة بسيطة
عاوزها ع طول تمشى على السطر وتكون ألف
وكل ما كنت أقولك بالراحة شوية
تقوللى أنا عاوزها تكون أحسن واحدة فى الدنيا
الدنيا مش مسابقة يا سلوى كل واحد فيها عاوز يثبت أنه أحسن من كل اللى حواليه
نظر إلى ابنته التى تمددت على الأرض من التعب وراحت فى النوم وقال فى سره:
للأسف اتعودت أنها تكون دائمًا مثالية ...أنا خايف عليك جدًا والله
ياما شفت مرضى بالاكتئاب بسبب المثالية..دائمًا غير راضيين عن أنفسهم
دائمًا يُصدمون فى غيرهم عندما يكتشفون أنه غير مثالى وأنه فعل خطأ ما
ربنا يحميك يا بنتى"
د. ياسر: قومى يا يارا نامى فى السرير
يارا: أنام إيه؟ انا عندى امتحان بكرة والمنهج كبير قوى
د. ياسر: عندك امتحان وقعدتى 4 ساعات تراجعى الشيت..مش كان أولى تذاكرى للامتحان
يارا: ما هو يا بابا أنا مقدرش أسلم السيت وفيه غلطة...قلت أخلصه وبعدين أذاكر
د. ياسر: طيب قومى يا بنتى وذاكرى اللى تقدرى عليه
اسمعى:
اعملى لكل باب نصف ساعة فقط ...ولنقلى على اللى بعده حتى لو مش متأكدة أنك مذاكره كويس
ومتفكريش إلا فى الباب اللى قدامك بس
يارا: أنا أصلا مش معقولة أنجح فى الامتحان ده...أنا بأفكر أعتذر للمعيد وأطلب التأجيل
د. ياسر: يا يارا ميت مرة أقولك بطلى
All or no thinking
ده....يا أما تعملى الحاجة على أكمل وجه يا أما متتعملش خالص
وبعدين أنا عاوز أسأل سؤال..أنتى إزاى امبارح قعدتى تتفرجى على التليفزيون 5 ساعات وأنتى وراكى شيت وامتحان؟
يارا: ما هو يا بابا بصراحة أنا كنت بأهرب ...بأعمل
procrastination
زى ما حضرتك بتقول
بس بجد مكنتش قادرة خالص أبدأ فى المذاكرة
د. ياسر: ده عشان بتفكرى أن وراكى حاجات كتير قوى ومش هتقدرى تعمليها على أكمل وجه زى ما أنتى عاوزة
قلنا ميت مرة نقسم الحاجة اللى عاوزين نعملها لحاجات صغيرة ونعمل حاجة بحاجة
يلا عشان عاوز أنام شوية قبل الشغل
فى المساء ...جلست (يارا) تتناول بعضًا من الإيس كريم...تظاهر د. ياسر بأنه لا يراها...هو يعلم أنها عاملة دايت بقالها أسبوعين ولكن مفيش مشكلة أنها تأكل حاجة نفسها فيها خاصة مع ضغط الامتحان
يارا: بابا أطلب لحضرتك بيتزا معايا
د. ياسر: وماله يا حبيتى؟
يارا: أصلى قررت أبوظ الريجيم النهاردة
د. ياسر: مفيش مشكلة
بعد أكل البيتزا...يارا تبكى بشدة
د. ياسر: يا يارا يا حبيبتى أنا مش فاهم إيه المشكلة؟
يارا: أنا أصلا عمرتى ما عرفت التزم بالريجيم أنا مش هأعمل ريجيم تانى
د. ياسر: قوللى يا يارا أنتى عملتى ريجيم كام مرة قبل كده؟
يارا: حوالى 10 مرات
د. ياسر: وكل مرة التزمتى حوالى كام يوم؟
يارا: يعنى فى مرات أسبوعين ومرات شهر ومرة قعدت ملتزمة 3 شهور
د. ياسر: يبقى أزاى عمرك ما عرفتى تلتزمى؟
المشكلة أنك كل مرة بتتضعفى بعد فترة من الزمن وهذا طبيعى
ولكنك لما بتلاقى نفسك خرفتى بتقفى بدل ما نشد اليوم اللى بعده تانى ونروح الجيم عشان نضيع تأثير ما أكلتيه
يارا: ما هو بصراحة أنا مش بأقدر ..أول ما بأبوظ باحس أن خلاص الدنيا انتهت
وابتدى أكل تانى كل اللى كنت محرومة منه وزى ما حضرتك عارف بأزيد كل اللى خسيته وعليهم حبة كمان
عشان كده أنا بأفكر أنى معملش ريجيم تانى خالص عشان بتكون المحصلة النهائية أنى أزيد
د. ياسر: مشكلتك يا يارا أنك مش بتعرفى تسامحى نفسك
جميل أن يسعى الإنسان لاتقان كل شىء ...لكن أحنا فى الحياة نقوم بأدوار كثيرة
وصعب قوى نتقنها كلها...لازم نضحى بشىء من الجودة هنا وهناك على حسب أهمية الموضوع
أنتى بأه كل الحاجات عندك يا أما مهمة خالص..با اما ملهاش أى أهمية
يا اما تتعمل زى ما أنتى عاوزة بالظبط...يا أما بلاش
مفيش وسط
أنا نفسى تعيشى حياتك كلها تروحى الجامعة وتذاكرى وتخرجى وتلعبى رياضة وتحفظى قرآن وتقرأى كتب تانية ....تعملى كل حاجة بتوازن
تعرفى فى واحد جالى العيادة من يومين عنده 50 سنة بيقولى يا دكتور وانا عندى 20 سنة كان نفسى أحفظ القرآن كله فى سنة
وبعدين مقدرتش أواظب أكثر من شهر على الجدول فتركت الحفظ إلى الآن
بأفكر كتير أنى لو كنت حفظت جزء كل سنة كنت زمانى أتممت حفظ القرآن
جزء فى السنة يعنى أقل من صفحة فى الشهر!
يارا: بس أنا يا بابا أقدر أحفظ 3 أجزاء فى الشهر وأخلص القرآن فى 10 شهور
د. ياسر: يا يارا جميل الهمة العالية هذه لكن لازم تحسبى الوقت اللى هياخده الحفظ وأنتى تقدرى عليه فى ظروفك الحالية أم لا
وبعدين الاحسن الواحد يعمل العمل بشكل تدرجيى..مشيها صفحة فى الشهر ولا فى الأسبوع وبعدين زودى عليها بعد 4 ولا 5 شهور
يارا: معرفش يا بابا أنا بأحس يا أما أشد على نفسى جامد يا أما معملش حاجة خالص
د. ياسر: ما هو يا بنتى أحب الأعمال إلى الله أدوامها وإن قل
أهم حاجة الاستمرار...يعنى تفتكرى لو أنتى مقررة تحفظى صفحة فى الشهر وبعد الشر موتى..ربناهيحاسبك على إيه؟
يارا: اعتقد على نية أنى كنت عاوزة أحفظ القرآن كله
د. ياسر: بالظبط لكن صاحبنا اللى عنده 50 سنة ده لو كان مات وهو عنده 40 سنة مكنش هياخد هذا الثواب لأنه ترك العمل
فهمتنى؟
يارا: يا بابا أنا فاهمة كويس...بس مش بأقدر أنفذ اللى حضرتك بتقوله ده
د. ياسر: لازم تتعودى يا يارا تقولى لنفسك دائمًا كلام إيجابى وتتذكرى الحاجات الكويسة اللى نجحتى فيها وعملتيها بتوفيق ربنا طبعًا
يلا أحنا لازم دلوقتى نحتفل بأنك انجزتى أسبوعين من الريجيم بتاعك...يلا تعالى نروح السينما
يارا: سينما إيه بس يا بابا؟ ما أنا لسه مبوظة
د. ياسر: بأقولك هنحتفل بإنجازك وهننسى النهاردة وبعد أسبوعين تانيين هنحتفل تانى
يارا: بس إن شاء الله هأخس فى الأسبوعين دول خمسة كيلو
د. ياسر: يارا!! هم 2 كيلو بس..لازم نحط هدف معقول
يلا عشان ميعاد الفيلم هيروح
--------------------------------------
لإيجاز نقط الشخصية ذات النزعة المثالية:
1-All or nothing thinking
2- دائمًا ما تحط من قدرها وترى نفسها فاشلة أو غير ناجحة
3- Procrastination
للهروب من المهام ﻷنهم غير قادرين على إنجزاها إلا بطريقة مثالية
4- عدم ترتيب الأوليات (تضييع وقت طويل فى مراجعة الشيت وعدم الصلاة أو النوم أوالمذاكرة للأمتحان
5- Overestimation of Goals
بمعنى أنهم يضعون أهدافًا كبيرة غير واقعية فى مدة زمن غير مناسبة (هتحفظ القرآن فى 10 شهور
6- ترى عيوبها وأخطائها بشكل كارثى
7- الحذر الشديد لدرجة الكذب من أى موقف يبين أحد عيوب الشخصية أو أن يظهر الشخص على أنه
perfectionist
8- عدم تقبل النقد بسهولة
9-
فى مراحل متأخرة يُصاب هذا الشخص بالاكتئاب الشديد
وقد تصل لمحاولة الانتحار فى بعض الأحيان
العلاج:
1- تقسيم المهام الكبيرة إلى مهام صغيرة وعمل وقت محدد لها فإذا لم تنجز يتم الانتقال للعمل التالى
2- تذكر الأشياء الايجابية باستمرار التى انجزها الشخص
3- طلب الدعم والمساعدة من شخص مقرب وخاصة عند الشعور بالفشل والإحباط وإذا لم يوجد يتخيل الشخص
وجوده ويحاول أن يتصور ماذا سيقول الأب الحنون أو الصديق المخلص فى هذه اللحظات
4- الاحتفال بالإنجازات والانتصارات
5- التركيز على الأشياء التى تم إنجازها والصورة الكلية
وليس الأخطاء البسيطة
6-تقسيم المهام إلى أوليات والرضا ببعض التقصير فى الحاجات التى لا تمثل أهمية كبرى
7- لو شعرت أن الأمر خارج عن تحكمك، فمن الأفضل استشارة طبيب نفسى
ننويه 1: هناك شخصيات تجمع ما بين النزعة المثالية والنرجسية التى تكلمنا عنها فى الحلقة الثالثة كما أن هناك شخصيات تجمع بين النرجسية والحدية
التى تحدثنا عنه فى الحلقة الأولى
تنويه 2: تمت المراجعة من الطبيبة النفسية ريهام نجيب
للمزيد من المراجع:
1- How to help a perfectionist?
2- 10 Ways To Tell If You Are A Perfectionist
3- The Perfectionist Personality Disorder
4- Why perfect is not always best
دينا سعيد
2-9-2012
No comments:
Post a Comment